ᑕᐃᒪᙵᓂᑦ ᓯᕗᓪᓕᖅᐹᒥᑦ ᑭᕙᓪᓕᕐᒥᑦ ᑕᐅᖅᓰᖃᑎᒌᒃᑎᑦᑎᓂᖅ ᐱᒋᐊᕐᒪᑦ 2009-ᒥᑦ, ᑭᕙᓪᓕᕐᒥᑦ ᑕᐅᖅᓰᖃᑎᒌᒃᑎᑦᑎᓂᖅ ᑕᐅᑐᒐᖃᐃᓐᓇᖃᑦᑕᖅᑐᖅ ᓴᖅᕿᔮᖅᑎᑕᐅᓂᖓᓄᑦ ᐊᒻᒪᓗ ᐱᕙᓪᓕᐊᓂᕐᒥᒃ ᓇᖕᒥᓂᖅ ᐱᓕᕆᐊᖅᑖᖅᐸᓪᓕᐊᓂᕐᒥᑦ ᑭᕙᓪᓕᕐᒥᑦ. ᓴᖅᕿᑕᐅᖅᖃᐅᑕᐅᓚᐅᖅᑐᖅ ᒪᒃᑯᒃᑐᓂᒃ ᐃᓕᓐᓂᐊᖅᑎᑦᑎᓂᕐᒧᑦ ᐊᕐᕌᒍᑕᒫᖅ ᑭᕙᓪᓕᕐᒥᑦ ᑕᐅᖅᓰᖃᑎᒌᒃᑎᑦᑎᓂᕐᒥᑦ, ᑭᕙᓪᓕᕐᒥᑦ ᓇᖕᒥᓂᖅ ᐱᓕᕆᐊᖅᑖᖅᐸᓪᓕᐊᓂᕐᒧᑦ ᑐᕌᖓᔪᖅ (KEP) ᐋᖅᕿᒃᓯᓯᒪᓕᖅᑐᖅ ᐃᖕᒥᒃᑰᖓᑉᓗᓂ ᑐᕌᖓᔪᒥᑦ. KEP ᐱᒻᒪᕆᐅᑉᓗᓂ ᐃᓚᒋᔭᐅᔫᑎᓪᓗᒍ ᓱᓕ ᐊᕐᕌᒍᑕᒫᖅ ᑭᕙᓪᓕᕐᒥᑦ ᑕᐅᖅᓰᖃᑎᒌᒃᑎᑦᑎᓂᕐᒥᑦ, ᒪᓂᒪᑎᑕᐅᓕᕐᒥᔪᖅ ᖃᕆᑕᐅᔭᒃᑯᑦ ᐊᒻᒪᓗ ᑕᒡᕙᐅᖃᑕᐅᓗᑎᑦ ᐃᓚᐅᖃᑕᐅᔪᖕᓇᕐᓗᑎᑦ ᑭᕙᓪᓕᕐᒥᑦ ᓄᓇᓕᖕᓂᑦ.
ᑐᕌᖓᔪᒥᑦ ᐃᓚᐅᔪᑦ ᑐᑭᓯᑎᑕᐅᖃᑦᑕᖅᑐᑦ ᐊᑐᖅᑕᐅᔪᓂᒃ ᓇᖕᒥᓂᖅ ᐱᓕᕆᐊᖅᑖᖅᐸᓪᓕᐊᓂᕐᒧᑦ ᐊᒻᒪᓗ ᓇᖕᒥᓂᖅ ᐱᓕᕆᐊᕐᒥᑦ ᐱᕙᓪᓕᐊᓂᕐᒧᑦ. ᑕᓪᓕᒪᐃᑦ (5) ᐅᑉᓗᓄᑦ ᑐᕌᖓᔪᒥᑦ ᐃᓚᐅᔪᑦ ᓲᕐᓗ ᑮᓇᐅᔭᓕᕆᓂᕐᒥᒃ ᖃᐅᔨᒪᓂᖃᓕᕐᓂᖅ, ᓈᓴᐅᓯᕆᓂᕐᒥᒃ ᐊᒻᒪᓗ ᑮᓇᐅᔭᐃᑦ ᒥᒃᓵᓄᑦ ᑎᑎᖅᖃᐅᑎᓕᕆᓂᕐᒥᒃ, ᑐᑭᓯᐊᓕᕐᓗᒍ ᓇᖕᒥᓂᖅ ᐱᓕᕆᐊᕐᓄᑦ ᐸᕐᓇᐅᑎ, ᑐᑭᓕᐅᕆᓗᓂ ᓂᐅᕕᐊᒃᓴᓃᖓᔪᓂᒃ ᐊᒻᒪᓗ ᓂᐅᕕᕈᒪᔪᓃᖓᔪᓂᒃ, ᐊᒻᒪᓗ
ᑮᓇᐅᔭᖃᖅᑎᑕᐅᓂᕐᒧᑦ ᑐᕌᖓᔪᑦ. ᑲᑎᒪᓂᕐᓂᑦ, ᖃᐃᖁᔭᐅᓯᒪᔪᑦ ᐅᖃᓪᓚᒃᑏᑦ ᐅᖃᐅᓯᖃᕐᓂᐊᖅᑐᑦ ᐃᓚᐅᔪᓄᑦ ᐱᔾᔪᑕᐅᔪᓂᒃ ᐱᔾᔪᑎᖃᖅᑐᓂᒃ. ᖃᐃᖁᔭᐅᓯᒪᔪᑦ ᓄᓇᓕᖕᒥᑦ ᓇᖕᒥᓂᖅ ᐱᓕᕆᐊᒥᒃ ᓇᖕᒥᓂᖃᖅᑐᑦ, ᖃᐅᔨᒪᔭᖏᓐᓂᒃ ᐅᖃᓪᓚᐅᔾᔨᔩᑦ, ᒪᒃᑯᒃᑐᐃᑦ ᓇᖕᒥᓂᖅ ᐱᓕᕆᐊᖅᑖᖅᐸᓪᓕᐊᔪᑦ, ᓄᓇᓕᖕᒥᑦ ᐊᒻᒪᓗ ᑭᕙᓪᓕᕐᒥᑦ ᑐᕌᖓᔪᓄᑦ ᓯᕗᓕᐅᖅᑏᑦ, ᐊᒻᒪᓗ ᑮᓇᐅᔭᖃᖅᑎᑦᑎᔪᖕᓇᖅᑐᑦ ᐱᓕᕆᖃᑎᒋᔭᐅᔪᑦ. ᐃᓚᐅᖃᑕᐅᔪᑦ ᐃᓕᑦᑎᓂᐊᖅᑐᑦ ᓱᓇᐃᑦ ᐱᕝᕕᐅᔪᖕᓇᖅᑐᑦ ᑕᐃᒪᐅᖕᒪᖔᑕ ᐃᑲᔪᕐᓂᐊᕐᓗᑎᒃ ᓇᖕᒥᓂᖅ ᐱᓕᕆᐊᖏᓐᓄᑦ, ᐊᒻᒪᓗ ᖃᓄᖅ ᑮᓇᐅᔭᓄᑦ ᐃᑲᔪᖅᑕᐅᔾᔪᑎᓂᒃ ᐱᔪᖕᓇᕐᒪᖔᑕ.
