ᑭᕙᓪᓕᕐᒥᑦ ᑕᐅᖅᓰᖃᑎᒌᒃᑯᑦ ᐱᔭᒃᓴᐅᑎᒋᔭᖓᑦ ᓴᖅᕿᔮᖅᑎᓪᓗᒋᑦ ᐊᒻᒪᓗ ᐱᕙᓪᓕᐊᑎᓪᓗᒋᑦ ᐱᕈᖅᐸᓪᓕᐊᓂᖏᓐᓄᑦ, ᓇᖕᒥᓂᖅ ᐱᓕᕆᐊᖃᖅᑐᑦ, ᓴᓇᙳᐊᖅᑏᑦ, ᑎᑕᒃᑏᑦ, ᓄᓇᓖᑦ, ᐊᒻᒪᓗ ᓇᖕᒥᓂᖅ ᐱᓕᕆᐊᖃᕐᓂᕐᒧᑦ ᐱᕙᓪᓕᐊᔪᑦ ᑭᕙᓪᓕᕐᒥᑦ. ᑕᐅᑐᒃᑕᕗᑦ ᑭᕙᓪᓕᕐᒧᑦ ᑭᕙᓪᓕᕐᒥᐅᑕᓗᒃᑖᑦ ᐱᕈᖅᐸᓪᓕᐊᓂᕐᒧᑦ ᐱᕕᖃᖅᑎᓪᓗᒋᑦ ᐱᔭᕆᐊᖃᖅᑕᖏᓐᓂᒃ ᐊᒻᒪᓗ ᐱᔪᒪᔭᖏᓐᓂᒃ ᖃᓄᐃᖏᑦᑎᐊᕐᓂᒃᑯᑦ ᐊᒻᒪᓗ ᐱᔭᕆᐊᖃᖅᑕᖏᓐᓂᑦ ᐃᓅᓯᖏᓐᓂᑦ ᐱᖃᖅᑎᓪᓗᒋᑦ ᐃᒃᐱᒍᓱᒡᕕᖃᖅᑐᓂᒃ ᐱᒻᒪᕆᐅᒋᔭᖏᓐᓄᑦ.

ᑭᕙᓪᓕᕐᒥᑦ ᑕᐅᖅᓰᖃᑎᒌᒃᑯᑦ ᑲᒪᔭᖃᖅᓯᒪᔪᑦ ᐊᕐᕌᒍᑕᒫᖅ ᑭᕙᓪᓕᕐᒥᑦ ᑕᐅᖅᓰᖃᑎᒌᒃᑎᑦᑎᓂᕐᓂᒃ ᑕᐃᒪᙵᓂᑦ 2009-ᒥᑦ ᐱᒋᐊᖅᖢᒍ, ᐊᒻᒪᓗ 2019-ᒥᑦ ᖁᕕᐊᓲᑎᖃᓚᐅᖅᑐᒍᑦ ᖁᓕᒋᓕᖅᑕᖓᓂᑦ ᑭᕙᓪᓕᕐᒥᑦ ᑕᐅᖅᓰᖃᑎᒌᒃᑎᑦᑎᓂᕆᔭᑉᑎᖕᓂᑦ. ᑕᐃᑉᓱᒪᓂ ᖃᐅᔨᒪᓚᐅᖏᑦᑐᒍᑦ 11-ᒋᓕᖅᑕᖓᓂᑦ ᐅᑭᐅᖅ ᓄᑖᓂᒃ ᐊᒃᓱᕈᕐᓇᖅᑐᖃᕐᓂᐊᕐᒪᑦ ᐱᔾᔪᑎᒋᑉᓗᒍ ᓄᕙᒡᔪᐊᕐᓇᖅ. ᑭᕙᓪᓕᕐᒥᑦ ᑕᐅᖅᓰᖃᑎᒌᒃᑎᑦᑎᓃᑦ 2020-ᒥᑦ ᐊᒻᒪᓗ 2021-ᒥᑦ ᓄᖅᖃᖅᑎᑕᐅᓚᐅᖅᑐᑦ ᓄᕙᒡᔪᐊᕐᓇᖅ-19 ᐱᔾᔪᑎᒋᑉᓗᒍ, ᑭᓯᐊᓂ ᑭᕙᓪᓕᕐᒥᑦ ᑕᐅᖅᓰᖃᑎᒌᒃᑯᑦ ᐱᓕᕆᐊᖃᐃᓐᓇᓚᐅᖅᑐᑦ ᖃᕆᑕᐅᔭᒃᑯᑦ ᑐᕌᖓᔪᓕᕆᓂᕐᓂᑦ, ᐊᒻᒪᓗ ᑭᕙᓪᓕᕐᒥᑦ ᑕᐅᖅᓰᖃᑎᒌᒃᑎᑦᑎᓂᖅ ᐅᑎᕐᓂᐊᖅᑐᖅ 13-ᒋᓕᖅᑕᖓᓂᑦ ᐅᑭᐅᓂᑦ 2022-ᒥᑦ.